Shri Kanchi kamakshi Temple

ಶ್ರೀ ಕಂಚಿ ಕಾಮಾಕ್ಷಿಯಮ್ಮ ದೇವಾಲಯ:-

                        ಸೌಮ್ಯ ಸ್ವರೂಪಿಣಿ ಮತ್ತು ಉಗ್ರರೂಪಿಣಿ ದೇವಿಯು ಒಂದೆಡೆ ನೆಲೆಸಲು ಸಾಧ್ಯವೇ? ಸಾಧ್ಯ ಎಂದು ನಿರೂಪಿಸಿದೆ ಮಡಿಕೇರಿಯ ಶ್ರೀ ಕಂಚಿ ಕಾಮಕ್ಷಿಯಮ್ಮ ದೇಗುಲ. ರಾಜಾ ಸೀಟ್ ನಿಂದ ಅನತಿದೂರದಲ್ಲಿ ಗೌಳಿಬೀದಿಯಲ್ಲಿರುವ ಈ ದೇಗುಲಕ್ಕೆ ಎರಡು ಶತಮಾನಗಳಿಗೂ ಮಿಗಿಲಾದ ಇತಿಹಾಸ. ಕೊಡಗಿನ ರಾಜರಿಂದ ನೆಲೆ ಗೊಳಿಸಲ್ಪಟ್ಟ ಶಕ್ತಿ ದೇವತೆಗಳಲ್ಲೊಂದು. 250 ವರ್ಷಗಳ ಹಿಂದೆ ತಮಿಳುನಾಡಿನಿಂದ ಗೌಳಿ ಜನಾಂಗದವರು ಮಡಿಕೇರಿಗೆ ಬಂದು ನೆಲೆಸಿದ್ದರು. ಈ ಜನಾಂಗದವರು ಎಲ್ಲಿ ನೆಲೆಸುತ್ತಾರೋ ಅಲ್ಲಿ ಕಂಚಿಕಾಮಾಕ್ಷಿಯಮ್ಮ ಮತ್ತು ಉಗ್ರಸ್ವರೂಪಿನಿಯಾದ ಮುತ್ತುಮಾರಿಯಮ್ಮ ದೇವಿಯರು ಸಹ ನಲೆಗೊಳ್ಳುತ್ತಾರಂತೆ. ಕಂಚಿ ಕಾಮಾಕ್ಷಿ ದೇವಿಯ ಆದಿಸ್ಥಾನ ತಮಿಳುನಾಡಿನ ಕಂಚಿ ಕಾಮಕೋಡಿ ಪೀಠ. ನಾಡಿನ ನಾಲ್ಕು ಶಕ್ತಿ ದೇವತೆಗಳಲ್ಲಿ ಒಂದಾಗಿರುವ ಈ ದೇವಿಯು ಪ್ರಜೆಗಳ ಕಷ್ಟ- ಕಾರ್ಪಣ್ಯಗಳ ನಿವಾರಕಿಯೆನಿಕೊಂಡಿದ್ದಾಳೆ. ಕೈಯಲ್ಲಿ ಗಿಣಿಯೊಂದನ್ನು ಹಿಡಿದುಕೊಂಡಿರುವುದು ಈ ಶಾಂತ ಸ್ವರೂಪಿಣಿಯ ವೈಶಿಷ್ಟತೆ. 

                         ಪುರಾತನ ದೇಗುಲವು ಕಾಲಾಂತರದಿಂದ ಹಲವಾರು ಮಾರ್ಪಾಡುಗಳನ್ನು ಹೊಂದುತ್ತಾ ಬಂದು ಪ್ರಸ್ತುತ ನಗರದ ಬೃಹತ್ ದೇಗುಲಗಳಲ್ಲಿ ಒಂದೆನಿಸಿದೆ. ಗರ್ಭಗುಡಿಯಲ್ಲಿ ಪುರಾತನ ಮೂಲ ವಿಗ್ರಹವಿದೆ. ದೇಗುಲದ ನವೀಕರಣದ ಕೆಲಸವೂ ಸಾಗುತ್ತಿದೆ. ಬೃಹತ್ ದೇಗುಲಕ್ಕೆ ವಿಶಿಷದಟವಾದ ರಾಜಗೋಪುರ ನಿರ್ಮಾಣವಾಗಿದೆ. ಈ ಗೋಪುರ ಹೊಯ್ಸಳ ಶೈಲಿಯಲ್ಲಿದೆ. ಒಳಗೆ ಪ್ರತ್ಯೇಕ ಗರ್ಭಗುಡಿಯೂ ಬೃಹದಾಕಾರದಲ್ಲಿದೆ. ಇತ್ತೀಚೆಗೆ ನಡೆಸಿದ ಸ್ವರ್ಣ  ಪ್ರಶ್ನೆಯಲ್ಲಿನ ಸಲಹೆಯ ಮೇರೆಗೆ ದೇಗುಲದಲ್ಲಿ ಶಾಂತರೂಪಿ ಕಂಚಿ ಕಾಮಾಕ್ಷಿಯಮ್ಮ ಮತ್ತು ಉಗ್ರರೂಪಿ  ಮುತ್ತುಮಾರಿಯಮ್ಮನಿಗೆ ಪ್ರತ್ಯೇಕವಾಗಿ ಗರ್ಭಗುಡಿಗಳನ್ನು ನಿರ್ಮಿಸಲಾಗಿತ್ತು. (ಇದುವರೆಗೆ ಒಂದೇ ಗರ್ಭಗುಡಿ ಇದ್ದಿತ್ತು ಮತ್ತು ಮುತ್ತು ಮಾರಿಯಮ್ಮ ದೇಗುಲದಲ್ಲಿ ನೆಲೆಯಿರುವ ಬಗ್ಗೆ ಸಾರ್ವಜನಿಕರಿಗೆ ಅರಿವೆ ಇರಲಿಲ್ಲ). ಈ ಎರಡು ದೇವಿಯರ ವಿಗ್ರಹಗಳ ನಿರ್ಮಾಣ ಕಾರ್ಯ ಸಾಗುತ್ತಿದೆ. ಮುಂದಿನ ಸಾಲಿನಲ್ಲಿ ನಡೆಯುವ ಕುಂಭಮೇಳದ ಸಮಯದಲ್ಲಿ ವಿಗ್ರಹ ಪ್ರತಿಷ್ಠಾಪನೆಯೂ ನಡೆಯಲಿದೆ. ಅತೀ ವೆಚ್ಚದ ಈ ಯೋಜನೆಗಳನ್ನು ದೇವಾಲಯ ಆಡಳಿತ ಮಂಡಳಿ ನಿರ್ವಹಿಸುತ್ತಿದೆ. ಉಳಿದ ಶಕ್ತಿ ದೇವತಾ ದೇಗುಲಗಳಂತೆ ಇಲ್ಲೂ ಗೌಳಿ ಜನಾಂಗೀಯರಿಂದಲೇ ದೇವಿಗೆ ಪೂಜೆ ಪುರಸ್ಕಾರ.

                           ಈ ದೇಗುಲದಲ್ಲಿ ವಾರ್ಷಿಕವಾಗಿ ನಡೆಯುವ ಉತ್ಸವಗಳಲ್ಲಿ ಕೃಷ್ಣ ಜನ್ಮಾಷ್ಟಮಿ ಮತ್ತು ಅಯ್ಯಪ್ಪ ಸ್ವಾಮಿ ಪೂಜೆಗಳು ಹಬ್ಬ ಹರಿದಿನಗಳ ವಿಶೇಷ ಪೂಜೆ ಸೇರಿವೆ. ನವರಾತ್ರಿಯ ವಿಜೃಂಭಣೆಯೇ ಬೇರೆ. ಈ ದೇಗುಲದಿಂದ ಕರುವನ್ನು ಹೊರಡಿಸುತ್ತಾರೆ. ನಂತರ ಕುಂಭ ಮತ್ತು ಶಾಂತಿಪೂಜೆಗಳು ನಡೆಯುತ್ತದೆ. ಮತ್ತೊಂದು ಪ್ರಮುಖ ಉತ್ಸವ ಮಾರಿಯಮ್ಮ ಪೂಜೆ. ಏಪ್ರಿಲ್ ತಿಂಗಳಲ್ಲಿ ನಡೆಯುವ ಈ ಉತ್ಸವದ ಸಂದರ್ಭದಲ್ಲೂ ಕರಗವು ಹೂವಿನಿಂದ ಅಲಂಕೃತವಾಗಿರದೇ ಬೇವಿನ ಸೊಪ್ಪಿನಿಂದ ಅಲಂಕೃತವಾಗಿರುತ್ತದೆ. ಇದನ್ನು ‘ಪಚ್ಚೆ ಕರಗ’ ಎಂದು ಕರೆಯುತ್ತಾರೆ. ಈ ಉತ್ಸವ ಮೂರು ದಿನಗಳದ್ದಾಗಿರುತ್ತದೆ. ಪ್ರತಿ ಶುಕ್ರವಾರ ವಿಶೇಷ ಪೂಜೆಕಾರ್ಯಗಳು, ಭಜನೆಗಳು ನಡೆಯುತ್ತದೆ. ನಿತ್ಯಪೂಜೆಯನ್ನೂ ಸಲ್ಲಿಸಲಾಗುತ್ತಿದೆ.

ad4
ad1
ad2
ad3
ad4
ad5
ad6
ad7
ad8
ad9
ad10
ad11
ad12
ad13

Related Information