Nagaralli Suggi festival

ನಗರಹಳ್ಳಿಯ ಸುಗ್ಗಿ ಹಬ್ಬ :   

                         ಸೋಮವಾರಪೇಟೆಯ ನಗರಕ್ಕೆ ಗ್ರಾಮದಲ್ಲಿ ಸುತ್ತಲಿನ 18 ಗ್ರಾಮದವರು ಸೇರಿ ಪ್ರತಿ 12 ವರ್ಷಕ್ಕೊಮ್ಮೆ ನಡೆಸುವ ಹೆಮ್ಮಕ್ಕಳ ಸುಗ್ಗಿ ಏಪ್ರಿಲ್ ನಲ್ಲಿ ನಡೆಯುತ್ತದೆ. ಪಶ್ಚಿಮ ಘಟ್ಟದ ಪುಷ್ಪಗಿರಿಯ ತಪ್ಪಲಿನಲ್ಲಿ ಹುದುಗಿರುವ ಅಪ್ಪ ಮಲೆನಾಡಿನ ಈ ಗ್ರಾಮಗಳಲ್ಲಿ ರಥೋತ್ಸವದಂತಹ ಆಚರಣೆಗಳು ವಿರಳ. ಬದಲಿಗೆ ಯುಗಾದಿ ಹಬ್ಬ ಕಳೆದ ಬಳಿಕ ಇಲ್ಲಿನ ಗ್ರಾಮೀಣ ಭಾಗದಲ್ಲಿ ಜಾನಪದ ಆಚರಣೆಯಾದ ಸುಬ್ಬಮ್ಮ ದೇವರ ಸುಗ್ಗಿಯ ಹಬ್ಬವನ್ನು ವೈವಿಧ್ಯವಾಗಿ ಹಾಗೂ ಸಡಗರದಿಂದ ನಡೆಸಲಾಗುತ್ತದೆ. ಇವುಗಳಲ್ಲಿ ನಗರಳ್ಳಿ ಕೂತಿ, ಯಡೂರು ಹಾಗೂ ಚೌಡ್ಲು ಮುಂತಾದ ಗ್ರಾಮಗಳಲ್ಲಿ ಆಚರಿಸುವ ಸುಗ್ಗಿಯ ಹಬ್ಬದ ಆಚರಣೆಗಳು ಪ್ರಮುಖವಾಗಿದೆ. ಅದರಲ್ಲಿಯೂ ನಗರಳ್ಳಿ ಗ್ರಾಮದ ಸುಗ್ಗಿಯ ಹಬ್ಬವು ಅನೇಕ ವಿಶಿಷ್ಟತೆಗಳನ್ನು ಹೊಂದಿದೆ. ಇಲ್ಲಿ ಪ್ರತಿ 12 ವರ್ಷಗಳಿಗೊಮ್ಮೆ ಹೆಂಗಸರೆಲ್ಲಾ ಸೇರಿ ನರ್ತಿಸಿ ಸುಬ್ಬಮ್ಮನನ್ನು ಆರಾಧಿಸುವ ಮೂಲಕ ಹೆಮ್ಮಕ್ಕಳ ಸುಗ್ಗಿ ಆಚರಿಸುವ ಸಂಪ್ರದಾಯವನ್ನು ಅತಿ ಪುರಾತನ ಕಾಲದಿಂದಲೂ ನಡೆಸಿಕೊಂಡು ಬರಲಾಗುತ್ತದೆ. ಒಮದು ಬಾರಿ ಡಿಸೆಂಬರ್‍ನಲ್ಲಿ ಎಮ್ಮೆಯ ಸುಗ್ಗಿ ಎಂದು ಆಚರಣೆ ಮಾಡಲಾಗುತ್ತದೆ. ಇದನ್ನು ಆಚರಿಸಿದರೆ ಏಪ್ರಿಲ್‍ನಲ್ಲಿ ಮಾಮೂಲಿಯಾದ ಸುಗ್ಗಿ ಹಬ್ಬ ಆಚರಿಸುವಂತಿಲ್ಲ. ಬದಲಿಗೆ ಇದನ್ನು ಹೆಮ್ಮಕ್ಕಳ ಸುಗ್ಗಿ ಎಂಬುದಾಗಿ ಆಚರಿಸುವುದು ಕ್ರಮವಾಗಿದೆ. 

                        ಇದಾದ ನಂತರ ಮುಂದಿನ ವರ್ಷದ ಸುಗ್ಗಿಯನ್ನು ಮನೆದೇವರ ಹಬ್ಬವೆಂದು ಆಚರಿಸಿ, ಸುಗ್ಗಿ ಹಬ್ಬಕ್ಕೆ ಬಳಸುವ ಎಲ್ಲಾ ಸಾಮಗ್ರಿಗಳನ್ನು ಬದಲಾಯಿಸುವ ಪ್ರಕ್ರಿಯೆ ನಡೆಯುತ್ತದೆ. ಅಂದರೆ, ಸುಗ್ಗಿ ಹಬ್ಬದ ಸಾಮಾಗ್ರಿಗಳನ್ನು ಪ್ರತಿ 12 ವರ್ಷಗಗಳಿಗೊಮ್ಮೆ ಬದಲಾಯಿಸಿ ಹೊಸತನ್ನು ತಯಾರಿಸಿ ಬಳಸಲಾಗುತ್ತದೆ. ಹೀಗೆ ಪ್ರತಿ 12 ವರ್ಷಗಳಿಗೊಮ್ಮೆ ಎಮ್ಮೆಸುಗ್ಗಿ, ಹೆಣ್ಣು ಮಕ್ಕಳ ಸುಗ್ಗಿ ಹಾಗೂ ಮನೆದೇವರ ಹಬ್ಬದ ಆಚರಣೆಗಳನ್ನು ಆವರ್ತಿಯ ಪ್ರಕಾರ ನಡೆಸುತ್ತಾರೆ. 

                       ಹೆಣ್ಣು ಮಕ್ಕಳ ಸುಗ್ಗಿಯ ದಿನ ಬೆಳಿಗ್ಗೆ  6 ಗಂಟೆಯಿಂದ ಸುಗ್ಗಿಯ ಕಂಬದ ಪ್ರದೇಶದಲ್ಲಿ ಕಾರ್ಯಕ್ರಮಗಳು ಆರಂಭವಾಗುತ್ತದೆ. ಇಲ್ಲಿರುವ ಎತ್ತರದ ಕಲ್ಲಿನ ಕಂಬದ ಮೇಲೆ ನಾಲ್ಕು ಕವಲುಗಳನ್ನು ಹೊಂದಿದ ಮರದ ತುಂಡನ್ನು ಹಾಕಿರುತ್ತಾರೆ. ಇದಕ್ಕೆ ಬೆತ್ತದ ಬಳ್ಳಿಗಳನ್ನು ಕೆಳಗೆ ತೂಗುಬಿಟ್ಟಿರುತ್ತಾರೆ. ಬಳ್ಳಿಯ ಕೆಳಭಾಗದ ತುದಿಗೆ ಮರದ   ಮಣೆಗಳನ್ನು ಹಾಕಿರುತ್ತಾರೆ. ಈ ಈ ಮಣೆಗಳ ಮೇಲೆ ನಾಲ್ವರು ಅರ್ಚಕರು ಕೂತಿರುತ್ತಾರೆ. ಇವರನ್ನು ಗ್ರಾಮಸ್ಥರು ಕಂಬದ ಸುತ್ತ ಬೆತ್ತದ ಬಳ್ಳಿಯನ್ನು ಹಿಡಿದು ಸುತ್ತಿಸುತ್ತಾರೆ. ಇದಕ್ಕೆ ಊಲು ತೆಗೆಯುವುದು ಎನ್ನುತ್ತಾರೆ. ಇದಾದ ಬಳಿಕ ಇದರಿಂದ ಸ್ವಲ್ಪ ದೂರವಿರುವ ಕಾಡಿನಲ್ಲಿ ನಿರ್ದಿಷ್ಟವಾಗಿ ಗೊತ್ತುಮಾಡಿರುವ ಜಾಗಮನ್ನು ಹೆಣ್ಣುಮಕ್ಕಳ ರಂಗವೆಂದು ಕರೆಯುತ್ತಾರೆ. ಈ ಸ್ಥಳಕ್ಕೆ ಸಾಲಂಕೃತರಾದ ಮಹಿಳೆಯರು ಕಲಶ ಹೊತ್ತು ಸಾಗುತ್ತಾರೆ. ಈ ಜಾಗವನ್ನು 12 ಕಕ್ಕೆ ಮರದ ಕಂಬಗಳನ್ನು ವೃತ್ತಾಕಾರವಾಗಿ ಹೂಳಿ ಇದಕ್ಕೆ ಕಬಳಿ ಬಳ್ಳಿಯನ್ನು 3 ಸುತ್ತು ಬರುವಂತೆ ಕಟ್ಟುತ್ತಾರೆ. ಇದು ರಕ್ಷಿತ ಪ್ರದೇಶವಾಗಿದ್ದು ಕೇವಲ ಸ್ತ್ರೀಯರಿಗೆ ಮಾತ್ರ ಪ್ರವೇಶವಿರುತ್ತದೆ. ಕಳಶ ಹೊತ್ತ ಮಹಿಳೆಯರು ಬನದ ಸುತ್ತ ಪ್ರದಕ್ಷಿಣೆ ಬಂದು ದೇವರ ಹಾಡು ಹೇಳಿ ಕುಣಿಯುತ್ತಾರೆ. ಈ ಸುಗ್ಗಿ ಹಬ್ಬದಲ್ಲಿ ಹೆಣ್ಣುಮಕ್ಕಳು ಮುಖ್ಯವಾಗಿರುವುದರಿಂದ ಇದನ್ನು ಹೆಮ್ಮಕ್ಕಳ ಸುಗ್ಗಿ ಎಂದು ಕರೆಯುತ್ತಾರೆ. 

                       ಹದಿನೈದು ದಿನಗಳ ಮೊದಲೇ ಹಬ್ಬದ ವಿಧಿವಿಧಾನಗಳು ಆರಂಭಗೊಳ್ಳುತ್ತವೆ. ಗಡಿಜಾಗದಲ್ಲಿರುವ ಮತ್ತು ನೀರಿ ಬೆಟ್ಟ ಎಂಬ ಸ್ಥಳದಲ್ಲಿರುವ ದೇವರನ್ನು ಸುಗ್ಗಿ ಹಬ್ಬದ ಸ್ಥಳಕ್ಕೆ ಆಹ್ವಾನಿಸಿ ಕರೆತರುತ್ತಾರೆ ಸುಗ್ಗಿಯ ರಂಗವನ್ನು ಶುದ್ದಿಗೊಳಿಸುತ್ತಾರೆ. ಈ ಸಂದರ್ಭದಲ್ಲಿ ಉಪವಾಸ ಹಾಗೂ ಇತರ ಮಡಿ ಮೈಲಿಗೆ ನಿಯಮಗಳನ್ನು ಕಟ್ಟುನಿಟ್ಟಾಗಿ ಆಚರಿಸುತ್ತಾರೆ. ರಾತ್ರಿಮೇಳೆ ಆಯಾ ಊರುಗಳಲ್ಲಿ ನಡೆಯುವ ಈ ಉತ್ಸವದಲ್ಲಿ ದೇವರ ಹಾಡು ಹೇಳುತ್ತಾ ಕೋಲಾಟಮಾಡಿ ನರ್ತಿಸುತ್ತಾರೆ. ಮರುದಿನ ಸಿಹಿಯೂಟ ಮಾಡುತ್ತಾರೆ. 

                      ಸುಗ್ಗಿಯ ಹಬ್ಬದಲ್ಲಿ ಗ್ರಾಮದ ಎಲ್ಲಾ ಜಾತಿಯ ಜನರೂ ಪಾಲ್ಗೋಳ್ಳುವರು. ಆಯಾ ಜಾತಿಯವರಿಗೆ ನಿರ್ದಿಷ್ಟವಾದ ಜವಬ್ದಾರಿ ವಹಿಸುತ್ತಾರೆ. ಎಲ್ಲರಿಗೂ ಒಟ್ಟಾಗಿ ಕೆಲಸ ಮಾಡದಿದ್ದರೆ ಸುಗ್ಗಿಯ ಹಬ್ಬದ ಕಾರ್ಯಗಳು ಮುಂದುವರಿಯುವುದಿಲ್ಲ. ಹೀಗಾಗಿ ಸೌಹಾರ್ದತೆ ಬೆಳೆಸಲು ಈ ಹಬ್ಬ ಸಹಕಾರಿಯಾಗಿದೆ. ಇಲ್ಲಿ ಅರ್ಚಕರು ಎಂದು ನಾಲ್ವರನ್ನು ಗುರ್ತಿಸಲಾಗುತ್ತದೆ. ಇವರೆಲ್ಲರೂ ಗೌಡ ಜನಾಂಗಕ್ಕೆ ಸೇರದವರಾಗಿದ್ದು ಗ್ರಾಮಸ್ಥರೇ ಪ್ರತಿವರ್ಷ ಸರತಿಯಂತೆ ಈ ಅರ್ಚಕಸ್ಥಾನದ ಜವಬ್ದಾರಿಯನ್ನು ನಿರ್ವಹಿಸುತ್ತಾರೆ. ಆಯ್ಕೆ:- ಕೊಡಗಿನ ಧಾರ್ಮಿಕ ಕೇಂದ್ರಗಳು ಮತ್ತು ಗ್ರಾಮೀಣ ಉತ್ಸವಗಳು ಲೇಖಕರು:- ಸಿ. ಎಸ್. ಸುರೇಶ್